Plantun de Prouvènço

Pèr coumpara dos planto d'encò nostre

Aegilops neglecta & Scrophularia nodosa

Blad-dóu-diable(-di-tres-espino)

Aegilops neglecta

Poaceae Graminaceae

Àutri noum : Blad-dóu-diable, Blad-de-cougiéu, Trauco-sa.

Noms en français : Égilope à trois arêtes, Égilope négligée.

Descripcioun :
Aquéu blad-dóu-diable, mens coumun que soun cousin, Aegilops geniculata trachis dins li tepiero seco souvènt sus siliço. Li glumo an 3 (2) arèsto e pas 4 (5). Èi tambèn mai long (>2cm) e pas verdau.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.

Port : Erbo
Taio : 20 à 50 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Aegilops
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 3 cm
Flourido : Printèms - Estiéu

Sòu : Si (Ca)
Autour basso e auto : 0 à 800 m
Aparado : Noun
Mai à juliet

Liò : Tepiero seco - Ermas
Estànci : Termoumediterran à Subremediterran
Couroulougi : Mediterrano-Touranièno
Ref. sc. : Aegilops neglecta Req. ex Bertol., 1835

Erbo-dis-escrolo

Scrophularia nodosa

Scrophulariaceae

Nom en français : Scrofulaire noueuse.

Descripcioun :
L'erbo-dis-escrolo douno d'èr à l'erbo-dóu-siège, pamens èi mens forto, sa tijo èi carrado mai sènso alo e pleno (fotò). Ei gaire coumuno au nostre, aleva dins lis Aup marino. Trachis dins li relarg fres.

Usanço :
Coume soun noum lou dis, l'erbo-dis-escrolo èro emplegado pèr gari (o pulèu sougna) lis escrolo que soun de boufigo (fotò) que vènon dins lou còu en rapport emé la tuberculòsi que ié disien à l'Age-Mejan, en latin, struma o morbus regius (mau de rèi). A l'Age-Mejan li rèi an lou poudé de gari lis escrofo ("écrouelles" en francés). A forto doso la planto pourrié èstre empouisounanto.